喺古代嘅封建社會當中，皇上嘅說話就係至高無上，而通過聖旨傳達嘅皇命就算去到偏遠嘅地區都依然係「見聖旨如見皇帝」。咁如果別有用心嘅人通過「假聖旨」假傳皇命，到底又行唔行得通呢？
雖然喺唔少影視作品當中都真係有人咁樣做，但歷史上嘅聖旨其實係有唔少「防偽」技術，並唔係咁容易可以假冒到。其一就係由材質講起，聖旨並唔係由簡單一張紙整成，而係由相當珍貴、皇室專用嘅布料製作，而且呢種布料長達兩米、表面充滿刺繡，單係製作就已經要幾個月時間，平常人係好難可以取得。
而且，傳聖旨係有一個好嚴謹嘅流程，由皇帝嘅旨意再去到相關部門撰寫以及蓋章，每個環節都有人負責同監督，再加上聖旨表面都會有特殊記號。喺明清朝時期，由於朱元璋鍾意喺詔書上加上「奉天承運」，所以日後聖旨開頭都是「奉天承運，皇帝詔曰」。當中嘅「奉」字係會按布上繡有嘅祥雲以及龍圖案而定，喺寫完「奉」字之後先至會由宮中嘅繡工獨一無二繡祥雲圖案上去。所以，可以話每一份聖旨都係「定製」，簡單呢個位置就已經可以辨認到真假，要假冒真係唔容易。
原圖嚟自網絡